ស្វាគមន៍មកកាន់រមណីយដ្ឋានកោះហាន

រមណីយដ្ឋានកោះហាន ស្ថិតនៅក្នុងសង្កាត់សាមគ្គី ជាប់ព្រំប្រទល់ស្រុកបុរីអូរស្វាយសែនជ័យ។ លោកអ្នកអាចធ្វើដំណើរឆ្លងកាត់ស្ពានសេកុង តាមបណ្តោយផ្លូវជាតិលេខ ៧ ចេញពីទីរួមខេត្តស្ទឹងត្រែង ឆ្ពោះទៅកាន់ព្រំប្រទល់ប្រទេសឡាវ ដែលមានចម្ងាយប្រហែល ២៤ គីឡូម៉ែត្រ រហូតដល់កំពង់ទូករមណីយដ្ឋានកោះហាន។

នៅទីនេះ យើងខ្ញុំមានចំណតរថយន្តធំទូលាយ រោងទទួលភ្ញៀវដ៏កក់ក្តៅ និងសួនលំហែបៃតង ព្រមទាំងមានផ្ទះស្នាក់ ឬផ្ទះលំហែឈើប្រណីតនៅក្បែរមាត់ទឹក ទល់មុខព្រៃលិចទឹកកោះហាន ប្រកបដោយបរិយាកាសខ្យល់បរិសុទ្ធ ស្ថិតក្នុងតំបន់ដីសើមរ៉ាមសារ ខេត្តស្ទឹងត្រែង។

រមណីយដ្ឋាននេះត្រូវបានបង្កើតឡើងតាំងពីឆ្នាំ ២០១៨ ក្នុងគោលបំណងគាំទ្រផ្ទាល់ដល់សេវាកម្មសហគមន៍ និងបងប្អូនប្រជាពលរដ្ឋរស់នៅលើកោះក្នុងតំបន់កោះហាន ឲ្យមានជីវភាពប្រសើរឡើង តាមរយៈការបម្រើសេវាទេសចរណ៍ប្រកបដោយគុណភាព សុវត្ថិភាព និងការទទួលខុសត្រូវខ្ពស់។